Euskadi Lagunkoia Berriko udalerrietako bisitak
Gaur, Adineko Pertsonentzako Hiri eta Komunitate Lagunkoien III. Mundu Kongresuaren testuinguruan, parte-hartzaileek Euskadi Lagunkoia Berria sarean garatutako hainbat esperientzia ezagutzeko aukera izan dute. Jarduera hauek, udal anfitrioien eta lurraldeko erakundeen laguntzarekin antolatu dira, lagunkoitasunaren printzipioen ezarpen praktikoa erakutsiz.
Esperientzien artean, Amurrion, Adinekoen Kontseiluaren jarduna ezagutarazi da, antzerki-emanaldi baten bidez. Azkoitian, «Pasira» ibilaldi osasungarriak belaunaldien arteko harremanak sustatzen ditu. Barakaldon, «Nire adinak ez nau definitzen» kanpaina ezagutarazi da, adinkeriaren aurkako sentsibilizazioa bultzatzen duena. Bilbon, bi ekimen osagarri aurkeztu dira: Aukeragune, harreman sozialak indartzeko, eta Zorrotza Lagunkoia, parte-hartze komunitarioa bultzatzeko. Donostian, BioGipuzkoako ikerketa proiektua bisitatu dute, eta Lugaritzeko Bizitza Osorako Etxebizitza modeloa ezagutu dute. Azkenik, Vitoria-Gasteizen, BIZAN zentroen eredua aurkeztu da, herritarren aktibitatean oinarrituta.
Bisita hauek erakunde publiko, profesional, ikertzaile eta gizarte erakundeen arteko lankidetza eta ideien trukea ahalbidetu dute, eta adinekoen protagonismoan oinarritutako ingurune lagunkoiak eraikitzeko beharra azpimarratu dute.
